బీసీ, ఈడబ్ల్యూఎస్, కాపు, ఎస్సీ, ఎస్టీ డీఎస్సీ అభ్యర్థులకు ఉచిత ఆన్లైన్ కోచింగ్
బీసీ, ఈడబ్ల్యూఎస్, కాపు, ఎస్సీ, ఎస్టీ వర్గాలకు చెందిన డీఎస్సీ అభ్యర్థుల కోసం ఉచిత ఆన్లైన్ శిక్షణా కార్యక్రమాన్ని మంత్రి సవిత ప్రారంభించారు. ఈ కార్యక్రమం సచివాలయంలో ఆమె చేతుల మీదుగా ప్రారంభమైంది. బీసీ స్టడీ సర్కిల్ పర్యవేక్షణలో, శామ్ ఇన్‌స్టిట్యూట్ రూపొందించిన 'ఆచార్య' యాప్ ద్వారా ఈ శిక్షణ అందించబడనుంది.
ఈ ఆన్లైన్ కోచింగ్ 24 గంటలు అందుబాటులో ఉంటుందని మంత్రి సవిత పేర్కొన్నారు. గృహిణులు, సుదూర ప్రాంతాల్లో నివసించే వారు, చిన్న ఉద్యోగాలు చేసే వారు ఆఫ్‌లైన్‌ కోచింగ్‌కు హాజరుకాలేక ఇబ్బంది పడుతున్నారని ఆమె చెప్పారు. ఈ సౌకర్యాన్ని అందించడానికి వారి విజ్ఞప్తి మేరకే ఆన్లైన్ శిక్షణ ప్రారంభిస్తున్నట్లు మంత్రి తెలిపారు.
శిక్షణా సమయంలో అర్హులైన అభ్యర్థులకు నెలకు రూ. 1500 చొప్పున ఉపకార వేతనం మరియు పుస్తకాలు కొనుగోలు చేయడానికి ₹1000 అదనంగా ఆర్థిక సహాయం అందజేయబడనుంది. ఈ ఆన్లైన్ ప్లాట్‌ఫామ్‌లో అనుభవజ్ఞులైన అధ్యాపకుల బోధనలు, అన్ని సబ్జెక్టుల పై స్టడీ మెటీరియల్స్, గత డీఎస్సీ ప్రశ్నపత్రాలు అందుబాటులో ఉంటాయని ఆమె తెలిపారు. ఈ అవకాశాన్ని అర్హులైన అభ్యర్థులు సద్వినియోగం చేసుకోవాలని ఆమె సూచించారు. శామ్ ఇన్‌స్టిట్యూట్‌కు ఈ రంగంలో విస్తృత అనుభవం ఉన్నందున, ఈ బాధ్యత వారికి అప్పగించినట్లు మంత్రి పేర్కొన్నారు.
