హైదరాబాద్‌లో ఘనంగా నిర్వహించిన 'అర్జున్ సన్నాఫ్ వైజయంతి' ప్రీ రిలీజ్ వేడుక ప్రేక్షకులను ఆకట్టుకుంది. కళ్యాణ్ రామ్ ప్రధాన పాత్రలో నటించిన ఈ చిత్రంలో విజయశాంతి ముఖ్యపాత్ర పోషించగా, సయీ మంజ్రేకర్ కథానాయికగా కనిపించనున్నారు. ప్రదీప్ చిలుకూరి దర్శకత్వం వహించిన ఈ సినిమా ఏప్రిల్ 18న విడుదల కానుంది. ఈ వేడుకలో విజయశాంతి మాట్లాడుతూ, సీనియర్ ఎన్టీఆర్ అంటే తనకు ఎంతో గౌరవమని, ఆయన నుంచి ఎన్నో విలువైన విషయాలు నేర్చుకున్నానని చెప్పారు. అలాగే, జూనియర్ ఎన్టీఆర్ కూడా అద్భుతంగా నటిస్తారని, సినిమాల పట్ల ఆయనకు ఉన్న ప్యాషన్‌ను కొనియాడారు. కళ్యాణ్ రామ్తో నటించడం ఎంతో ఆనందంగా ఉందని, ఆయన సహాయసహకారాన్ని ఆమె కొనియాడారు. వారిద్దరూ రామ-లక్ష్మణుల్లా ఉన్నారని తెలిపారు. ఈ సినిమా ప్రతి తల్లికి, ప్రతి మహిళకు అంకితమని పేర్కొన్నారు. అభిమానుల కోరిక మేరకు ఈ సినిమా చేయాలని నిర్ణయించుకున్నానని చెప్పిన విజయశాంతి, దర్శకుడు చెప్పిన కథ తనను ఆకట్టుకుందని, కొన్ని సూచనలతో కథ మరింత బలపడిందని తెలిపారు. ఎడిటర్ తమ్మిరాజు మరియు సెన్సార్ బోర్డు నుంచి వచ్చిన పాజిటివ్ ఫీడ్‌బ్యాక్ సినిమా పై విశ్వాసాన్ని పెంచిందన్నారు. తల్లి తన బిడ్డ కోసం ఎప్పుడూ తపనపడుతుందని, అతను తప్పుదారి పట్టినా సన్మార్గంలో నడిపిస్తుందని చెప్పారు. తల్లి-కొడుకు మధ్య ఉన్న ఎమోషనల్ డ్రామా, వారిద్దరి మధ్య ఎదురయ్యే సంఘర్షణలు ఈ చిత్రానికి ముఖ్యాకర్షణలుగా నిలవనున్నాయని వివరించారు. పూర్తిగా కమర్షియల్ ఎంటర్టైనర్‌గా రూపొందిన ఈ సినిమాలో క్లైమాక్స్ సన్నివేశం ప్రత్యేకంగా నిలుస్తుందన్నారు.