ఐసీసీ ఛాంపియన్స్ ట్రోఫీ విజేతగా భారత్! సౌరవ్ గంగూలీ జోస్యం
తేదీ & సమయం: 22-02-2025 శని 07:22 | వర్గం: స్పోర్ట్స్
- ఆదివారం భారత్ vs పాకిస్థాన్ హై-వోల్టేజ్ పోరు
- పాకిస్థాన్‌పై టీమిండియా అగ్రస్థానాన్ని కొనసాగిస్తుందన్న గంగూలీ
- పరిమిత ఓవర్ల క్రికెట్‌లో భారత్ అత్యంత బలమైన జట్టు
భారత మాజీ కెప్టెన్ సౌరవ్ గంగూలీ 2025 ఐసీసీ ఛాంపియన్స్ ట్రోఫీ విజేతగా భారత్ నిలుస్తుందని జోస్యం చెప్పారు. పాకిస్థాన్ కాకుండా ఈసారి విజేత భారత్‌నే అవుతుందని ఆయన విశ్వాసం వ్యక్తం చేశారు. పరిమిత ఓవర్ల క్రికెట్‌లో భారత్ చాలా బలమైన జట్టు అని గంగూలీ స్పష్టం చేశారు.
ఆదివారం భారత్, పాకిస్థాన్ మధ్య జరగనున్న మ్యాచ్‌పై క్రికెట్ ప్రపంచమంతా ఉత్కంఠగా ఎదురు చూస్తోంది. కేవలం అభిమానులే కాదు, మాజీ క్రికెట్ దిగ్గజాలు, సెలబ్రిటీలు కూడా ఈ మ్యాచ్‌పై ఆసక్తిని వ్యక్తం చేస్తున్నారు. ఈ నేపథ్యంలో గంగూలీ తన అభిప్రాయాన్ని పంచుకున్నారు.
గంగూలీ ప్రకారం, ఐసీసీ టోర్నమెంట్లలో భారత జట్టు అద్భుతమైన రికార్డు కొనసాగిస్తోంది. ఈసారి కూడా అదే జయపథాన్ని కొనసాగిస్తుందని ఆయన విశ్వాసం వ్యక్తం చేశారు. ముఖ్యంగా విరాట్ కోహ్లీ, రోహిత్ శర్మ, రవీంద్ర జడేజా లాంటి స్టార్ ఆటగాళ్లు భారత్ విజయంలో కీలక పాత్ర పోషిస్తారని గంగూలీ తెలిపారు.
